Այսօր՝ հունիսի 22-ին, ժամը 17։00-ին, Երևան քաղաքի Կենտրոն, Նորք–Մարաշ վարչական շրջանների ընդհանուր իրավասության դատարանից «Նուբարաշեն» քրեակատարողական հիմնարկ տեղափոխվեցին չորս երիտասարդներ։
Ինչպես News.armeniatv.com-ին հայտնում է ֆոտոլրագրող Գագիկ Շամշյանը, նշված երիտասարդներն են Դավիթ Ադամյանը, Գարիկ Մարգարյանը, Արթուր Բաբլոյանը և Արման Բաղդասարյանը։
Վերջիններս դատարան էին բերվել Ոստիկանության քրեական հետախուզության գլխավոր վարչության արագ հակազդման բաժնի աշխատակիցների հսկողությամբ՝ ձեռնաշղթայված վիճակում։
Ոստիկանության քննչական գլխավոր վարչության քննիչը միջնորդել էր նշված դատարան, որպեսզի այս չորս անձինք, որոնց արդեն մեղադրանք է առաջադրվել «Հարսնաքար» ռեստորանային համալիրում բժիշկներին առանձնակի դաժանությամբ ծեծի ենթարկելու համար, որպեսզի դատարանը նրանց նկատմամբ որպես խափանման միջոց ընտրի երկամսյա կալանքը։
Գագիկ Շամշյանը հայտնում է, որ նշված դատարանի դատավորներ Մնացական Մարտիրոսյանը, Էդիկ Ավետիսյանը և Գայանե Կարախանյանը դռնփակ դատական նիստն անցկացնելուց և խորհրդակցական սենյակից վերադառնալով բավարարեցին քննչական մարմնի միջնորդությունը։
Ինչպես News.armeniatv.com-ին երեկ հայտնել էր Գ. Շամշյանը, Ոստիկանության քրեական հետախուզության գլխավոր վարչության և նույն վարչության արագ հակազդման բաժնի աշխատակիցները Ոստիկանության Քննչական գլխավոր վարչություն էի տեղափոխել հինգ երիտասարդների: Ինչպես Tert.am-ին հայտնել էր ֆոտոլրագրող Գագիկ Շամշյանը, նշված երիտասարդները ՔԳՎ էին տեղափոխվել Ոստիկանության Երևան քաղաքի վարչության ձերբակալվածների պահման վայրից:
Գ. Շամշյանը հայտնել էր նաև, որ այդ երիտասարդները ԱԺ պատգամավոր, ՀՖՖ նախագահ Ռուբեն Հայրապետյանի ընտանիքին պատկանող «Հարսնաքար» ռեստորանային համալիրի աշխատակիցներ էին և կասկածվում էին նշված համալիրում 4 օր առաջ խուլիգանություն կատարելու և առանձնակի դաժանությամբ ծեծ իրականացնելու մեջ:
Գ. Շամշյանը հայտնել էր նաև, որ բացի վերը նշված 5 հոգին կա ևս 2 ձերբակալված, և նրանց թիվը կարող է մեծանալ:
Այդ 5 հոգին են Դավիթ Ադամյանը, Գարիկ Մարգարյանը, Արթուր Բաբլոյանը, Արման Բաղդասարյանը, Արման Խաչատրյանը, Դավիթ Հայրյանը և Նորայր Հայրապետյանը:
Հիշեցնենք, որ հունիսի 17-ի երեկոյան, ժամը 23:00-ի սահմաններում, ՀՀ ԱԺ պատգամավոր Ռուբեն Հայրապետյանին պատկանող «Հարսնաքար» ռեստորանում տեղի է ունեցել ծեծկռտուք, որի հետևանքով ՀՀ ՊՆ Կենտրոնական կլինիկական զինվորական հոսպիտալի աշխատակից, բուժծառայության մայոր Վահե Ավետյանն ենթարկվել է նյարդավիրաբուժական վիրահատության: Վերջինիս վիճակը գնահատվում է ծայրահեղ ծանր: Միջադեպի արդյունքում տարբեր աստիճանի վնասվածքներ են ստացել նաև նույն հոսպիտալի աշխատակից Արտակ Բայադյանը և ռազմական բժիշկ Գարիկ Սողոմոնյանը:
Նշենք, որ 3 օր առաջ՝ հունիսի 19-ին հայտարարությամբ հանդես եկավ Ոստիկանությունը՝ հավաստիացնելով, որ ամեն ինչ արվելու է միջադեպի բացահայտման և անաչառ քննության համար։ «Կատարվածով մտահոգ մեր համաքաղաքացիներին հավաստիացնում ենք. եթե կա երևույթը, այն հեղինակած անձը կամ անձինք պատժվելու են օրենքի ողջ խստությամբ: Այս պարագայում անտեղի են նաև օրենքը շրջանցելու վերաբերյալ կասկածները: Ոստիկանության կողմից օրենքը կիրառվում է ուղիղ, ողջ ծավալով, բոլորի համար և` թափանցիկ: Ոստիկանության համար սկզբունք է օրենքի առջև բոլորի հավասարությունը, բացառվում է օրենքի անունից օրինականության ոտնահարման հնարավորությունը, ամենաթողությունը, զոռբաների ու զոռբայության գոյությունը»,– մասնավորապես ասված էր հայտարարության մեջ:
Նշենք, որ ավելի վաղ հայտարարությամբ էր հանդես եկել նաև Ռուբեն Հայրապետյանը` հավաստիացնելով, որ ամեն ինչ անելու է, որպեսզի մեղավորները ստանան իրենց պատիժը։ «Ես պաշտոնապես հայտարարում եմ, որ ամեն ինչ անելու եմ, որպեսզի բոլոր հանցագործները` անկախ այն հանգամանքից նրանք անվտանգության աշխատակիցներ են, մատուցողներ, թե այլ ծառայություն իրականացնողներ, պատժվեն օրենքի ամբողջ խստությամբ: Ամեն ինչ անելու եմ, որպեսզի բոլոր գործողությունները լինեն թույլատրելիության սահմաններում բաց և թափանցիկ»,–մասնավորապես ասել էր Հայրապետյանը:
Լուսանկարները՝ Գագիկ Շամշյանի
